فەرمانبەران و خانه‌نشینان لە بارەی مووچەکانیان دڵنیا دەکرێنەوە


نەتەوە  |   17:59:39 2020-01-29  |   (194) جار خوێندراوەتەوە

loading...
ڕاوێژکاری دارایی سەرۆک وەزیرانی عێراق لەبارەی مووچەی فەرمانبەران و خانەنشینانەوە دڵنیایی دەدات، كه‌ بە هیچ شێوەیەک دەست بۆ مووچە نابردرێت.
A+    A-

 

له‌ لێدوانێكدا بۆ ڕۆژنامەی (سەباح)ی نیمچە فەرمیی عێراقی، مەزهەر محەمەد ساڵح، راوێژکاری دارایی عادل عەبدولمەهدی، سەرۆک وەزیرانی عێراق، رایگەیاندوه‌، "فەرمانبەران و خانەنشینان لەوە دڵنیا دەکەینەوە، کە گەرەنتیی مووچەکانیان بۆ ساڵی دارایی ٢٠٢٠ کراوە و بە هیچ شێوەیەک دەستی بۆ نابردرێت".


ئاماژه‌ی بۆ ئه‌وه‌شكردووه‌، لێکتێگەیشتن لە نێوان ئەنجوومەنی نوێنەرانی عێراق و ئەنجوومەنی وەزیرانی عێراق هەیە تاوەکوو پڕۆژەی بودجەیەک پێشکەش بە پەرلەمان بکرێت، کە بتوانرێت جێبەجێ بكرێت و بەدەم ئامانجە ئابووری و کۆمەڵایەتییەکانەوە بێت.


وتیشی: له‌وباره‌یه‌وه‌ کارەکانی وەزارەتی دارایی عێراق بەردەوامە، "سەرەڕای ئەوەی حکوومەتی کاربەڕێکەر ناتوانێت پڕۆژەیاسا تێپەڕێنێت"، بە وتەی ئه‌و راوێژکارە بودجەی ٢٠٢٠ پێویستی بە کەمکردنەوەی خەرجی و دابەزاندنی ڕێژەی کورتهێنان و بایەخدانی زیاتر بە هەندێک سەرچاوە هەیە.


پێشبینیشیكردووه‌، کە لە ماوەی چەند هەفتەی داهاتوودا، پڕۆژەیاسای بودجەی ٢٠٢٠ ئامادە بکرێت.





loading...