خانەوادەی خانمە هونەرمەند ماریا هەورامی روونکردنەوەیەکیان بڵاوکردەوە


نەتەوە  |   16:18:54 2019-08-14  |   (217) جار خوێندراوەتەوە

loading...
بێستون هەورامی برای ماریا هەورامی روونکردنەوەیەک لەسەر قسەکانی مەلا هەڵۆ بڵاودەکاتەوەو ئاشکرای دەکات کە ئەو کەسە خزمیان نییەو لەسەر بنەماڵەکەیان حسابی ناکەن و رووبەڕووی یاسای دەکەنەوە.
A+    A-

 

ئەمڕۆ چوارشەممە 2019/8/14 برایەکی ماریا هەورامی روونکردنەوەیەکی بڵاوکردەوە و تیایدا دەڵێت: "پاش ئەو وتە نابەجێیانەی بە ناو "مەلا" هەڵۆ، پاش هاتنە دەنگی رای گشتی، شەوی رابردوو لە روونکردنەوەیەکدا دان بە هەڵەی خۆیدا دەنێ و خۆشی بە خزممان دەزانێت، من وەک برای ماریا هەورامی رایدەگەیەنم کە ئەو بەڕێزە بە هیچ شێوەیەک بە خزمی خۆمان نازانین و ناشیناسین و حسابی ناکەین لەسەر بنەماڵەکەمان".

 

دەقی روونکردنەوەکە

بۆ هەوادارانی ماریا هەورامی و گوێگرانی گۆرانی و مۆسیقای کوردی.

"سەرەتا رێزو خۆشەویستیمان دەردەبڕین بۆ هەموو و نووسەر و کەسایەتی و رۆشنبیرو وەزارەتی رۆشنبیریی حکومەتی هەرێم و رێکخراو و پەیجانەی لە تۆڕە کۆمەڵایەتییەکاندا سەرسەختانە بەرگرییان لە هونەرمەند ماریا هەورامی و هونەری رەسەنی کوردی و کەلتوری پێشکەوتوخوازی هەورامان کرد، بەرامبەر بەو قسە نابەجێیانەی بەناو "مەلا" هەڵۆ".

ئێمە وەک بنەماڵەی ماریا جگە لە رێزو خۆشەویستی هەڵوێستەکانیان بەرزدەنرخێنین.

"دیارە ماریا نە یەکەم هونەرمەند و نە ئاخر کەسە کە ڕوبەڕوی ئەم هێرشە نا بەجێیانە ببێتەوە، بۆ بەرگرتن لەم هێرشە ناڕەوایانەی ناوبەناو دەکرێتە سەر هونەرمەند و نووسەران، پێویستمان بەیەک دەنگی سەرجەم رۆشبیران و رێکخراوەکانی کۆمەڵگەی مەدەنی و هونەرمەندان و کەسایەتی و هەموو مرۆڤێکی ئازادیخوازە، تا نەهێڵین لەم جۆرە کەسانە بەناوی ئایینەوە کەلتوری رەسەنی گەلەکەمان لە ناوبەرن و ئەوەی بە ئەنفال و کیمیاباران و وێرانکردن بۆیان نەکرا، دەیانەوێت لە رێگەی ترەوە لە ناومان بەرن، بەتایبەت لەڕێگەی چەند کەسێکی گوماناوی لەناو کۆمەڵگەی کوردی خۆمانەوە".

"بەداخەوە پاش ئەو وتە نابەجێیانە بە ناو "مەلا" هەڵۆ، پاش هاتنە دەنگی رای گشتی، شەوی رابردوو لە روونکردنەوەیەکدا دان بە هەڵەی خۆیدا دەنێ و خۆشی بە خزممان دەزانێ، من وەک برای ماریا هەورامی رایدەگەیەنم کە ئەو بەڕێزە بە هیچ شێوەیەک بەخزمی خۆمانی نازانین و ناشیناسین و حسابی ناکەین لەسەر بنەماڵەکەمان. بۆیە بڕیارمانداوە لە رێی یاساوە کاری خۆمان بکەین، با دادگا مافی تەشهیرکردن بە ماریا وەربگرێتەوە. ئەو بەڕێزەش با لە دادگا روونکردنەوەی خۆی بدات لەسەر وتەکانی".

"لەکۆتاییدا داواکارم یاسا سەروەربێت و داواکارم داواکاری گشتی بێدەنگ نەبن لەمجۆرە سووکایەتیکردنە و هەر جۆرە سووکایەتیکردنێک کە بەهەر مرۆڤێک لەم کوردستانەدا دەکرێت".

بێستون هەورامی

برای هونەرمەند ماریا هەورامی





loading...











زۆرترین بینراوەکان