حكوومەت چەند ماف و ئیمتیازێك بەم فەرمانبەرانه‌ دەدات


نەتەوە  |   16:47:34 2019-06-11  |   (3,422) جار خوێندراوەتەوە

loading...
بەپێی نوسراوی سەرۆكایەتی ئەنجومەنی وەزیران و وەزارەتی دارایی، ئاماژە بە چەند بڕیار و رێنماییەك كراوە بۆ پێدانی ماف و ئیمتیاز بە فەرمانبەرانی گرێبەست.
A+    A-

 

بەپێی نوسراوەكان، راژەی فەرمانبەری گرێبەست وەكو فەرمانبەری هەمیشەیی بە خزمەت ئەژمار دەكرێت، لەو حاڵەتەی كە دامەزرا بە هەمیشەیی، بەو مەرجەی پشكی خانەنشینیان لێوەربگیرێت و خزمەتیان بۆ ئەژمار دەكرێت.


سەبارەت بەو خاڵە، حازم ئیسماعیل بەرێوەبەری گشتی خانەنشینی هەرێم بەسایتی  باسنیوزی راگەیاندوه‌، لەو كاتەی فەرمانبەری گرێبەست بە هەمیشەیی دامەزرا ئەوكاتە خزمەتەكەی بۆ ئەژمار دەكرێت بۆ پرسی خانەنشینی، بەو مەرجەی كە دەبێت پشكی خانەنشینی لێوەربگیرێت، كە ئەوەش بەپێی ساڵانی خزمەت دەبێت".


وەزارەتی دارایی جەختی كردۆتەوە فەرمانبەری گرێبەست بۆی هەیە لە ساڵێكدا 30 رۆژ مۆڵەتی ئاسایی، لەگەڵ مۆڵەتی 8 رۆژ تاوەكو 15 رۆژ بۆ نەخۆشی، لەگەڵ مۆڵەتی بێ مووچە بۆ مانگێك وەربگرێت.


ئه‌وه‌شخراوه‌ته‌ڕوو، بۆ ئەو ئافرەتانەی گرێبەستن 72 رۆژ مۆڵەتی دایكایەتیان پێ دەدرێت، دوای ئەو مۆڵەتە بۆ ماوەی 2 مانگ مۆڵەتی نیو مووچەیان پێ دەدرێت ئەگەر لەو كاتە بەكاری نەهێنێت ناتواندرێت دواتر پێیان بدرێت، ئه‌مه‌ش له‌كاتێكدایه‌ پێشووتر رێگە بە فەرمانبەری گرێبەست نەدەدرا ئیفاد بكرێت، بەڵام بەپێی رێنماییەكە ئیفاد دەكرێن بۆ ناوخۆ، لەسەر بنەمای بڕوانامەكەشی شایستە داراییەكانی خەرجی ئیفادی بۆ دەكرێت.


لە نوسراوەكانی ئەنجومەنی وەزیران وەزارەتی دارایی ئاماژە بەوەكراوە، بەرزترین مووچەی فەرمانبەری گرێبەست 2 ملیۆن و 500 هەزار دینارە، كەمترینیش 250 هەزار دینارە، ئەویش لەسەر بنەمای بڕوانامە و جۆری كارەكەی ئەو بڕە پارەیەی بۆ دیاری دەكرێت و مانگانە پێی دەدرێت.


پێشووتر لە ساڵی 2013 بەپێی رێنمای 32 و 38 ی وەزارەتی دارایی،" هەر فەرمانبەرێك 3 ساڵی تەواوكرد دەتوانێت ببێتە فەرمانبەری هەمیشەیی بەو مەرجەی بودجەی بۆ تەرخان بكرێت"، بەڵام لە ماف و ئیمتیازە تازەكانی دارایی ئەو بابەتە باس نەكراوە.


جێی باسه‌، زیاتر لە 30 هەزار فەرمانبەری گرێبەست لە داموو دەزگاكانی حكوومەتی هەرێمی كوردستان كار دەكەن.


 





loading...











زۆرترین بینراوەکان