گردبوونه‌وه‌یه‌ك له‌ به‌رده‌م ماڵی تاڵه‌بانی ئه‌نجامدرا


نەتەوە  |   11:19:44 2018-10-16  |   (541) جار خوێندراوەتەوە

شۆفێرانی "بارهەڵگری مەرزی باشماخ" لە بەردەم ماڵی جه‌لال تاڵەبانی، سكرتێری كۆچكردوی یه‌كێتی له‌ ده‌باشانی سلێمانی گردبوونەوە و داوای ئازادکردنی شۆفێرە دەستگیرکراوەکان دەکەن.
A+    A-

 

شۆفێرانی بارهەڵگری مەرزی باشماخ چەند رۆژێکە بەردەوامن لە دەربڕینی ناڕەزایی و بە وتەی خۆیان لەدیوی ئێران مامەڵەی خراپیان لەگەڵدا دەکرێت و کەلوپەلی نایاسایی دەخرێتە بارەکانیانەوە.
 

یەکێک لە شۆفێرەکان ڕایگەیاندوه‌، لە ئێستادا لە نزیک نەخۆشخانەی شۆرش گردبوونەتەوە دەیانەوێت ئەمڕۆ سەردانی مەکتەبی سیاسی یەکێتی بکەن، تا وەڵامی‌ داواکارییەکانیان نەدرێتەوە رێگە بە جموجۆڵی بازرگانی نادەن.


ئەوەشی ڕاگەیاند، بەهۆی گردبوونەوە و ناڕەزاییەکانی دوو ڕۆژی ڕابردوویان ژمارەیەک کەسیان دەستگیرکراوە و چەند کەسێکیشیان برینداربوون.


وتیشی "یەکەم داواکاری ئێمە گۆڕینی بەرپرسی دەروازەی مەرزەکەیە چونکە ناتوانێت کێشەکانیان چارەسەر بکات".


ئەوەشی خستەڕوو "ژمارەیەک قاچاخچی لە دیوی‌ ئێران مامه‌ڵه‌ی‌ خراپیان له‌گه‌ڵدا دەکەن و خواردن‌ و كه‌لوپه‌لی‌ نایاسایی دەخرێتە بارەکانیانەوە و ئه‌گه‌ر ئاشكراشیان بكه‌ن مه‌ترسی‌ له‌سه‌رژیاینان دروستده‌بێت".


بەرپرسانی مەرزی‌ نێودەوڵەتی‌ باشماخ جەختدەكەنەوە، نابێت شۆفێرەکان دەستوەربدەنە کاروباری ئیداری مەرزەکە و دەشڵێن به‌رده‌وامبوونی‌ داخستنی مەرزەكە لەڕووی ئابوورییەوە كاریگەریی لەسەر داهاتی هەرێم دروستدەکات.
 
















زۆرترین بینراوەکان