نوێترین زانیاری لە‌بارە‌ى کەیسەکەی جەمال خاشقچى بڵاوکرایەوە


نەتەوە  |   13:51:50 2018-10-11  |   (142) جار خوێندراوەتەوە

رۆژنامەى (واشنتۆن پۆست) زانیارى نوێ دەربارەى پەیوەندیى جەمال خاشقچى، رۆژنامەنووسى سعودیە بە وڵاتەكەیەوە بڵاودەكاتەوەو راشیگەیاندووە ئەگەری هەیە ببێتە مایەى شەرمەزاریی بۆ حکومەتی ئەمریكا.
A+    A-


رۆژنامەکە لەسەر زارى بەرپرسانى ئەمریكاوە بڵاویانكردووەتەوە کە دەزگای هەواڵگریى ئەمریكا زانیاریى هەبووە سەبارەت بە پلانێكى سعودییە كە لەلایەن محەمەد بن سەلمان-ى جێنشێنەوە فەرمانى پێكراوەو ناوەڕۆكەكەى بریتى بووە لە گەڕاندنەوەى خاشقچى بۆ سعودیە بەمەبەستى دەستگیركردنى.

 

رۆژنامەكە، كە پێشتر خاشقچى وتارى تیایدا دەنووسی، لەسەر زارى بەرپرسانى ئەمریكاوە  ئەوەی بڵاوکردووەتەوە کە بەرپرسانى سعودیە لەرێى پەیوەندیى تەلەفۆنییەوە پلانێكیان تاوتوێكردووە سەبارەت بە  بەئامانجگرتنى خاشقچى لە شوێنى مانەوەى لە ویلایەتى فێرجینیای ئەمریکاو دەستگیركردنى.

 

هەر بەپێى ئەو رۆژنامەیە خاشقچی لەبەردەم زۆرێك لە هاوڕێكانیدا گومانى خۆى نیشانداوە لەو بەڵێنانەى کە لەلایەن بەرپرسانى سعودیەی نزیك لە جێنشین"ەوە پێیدراوە دەربارەى پێدانى پۆستى حكومى باڵا لە سعودیەو لەگەڵ فەراهەمكردنى پاراستنیدا.

 

ئاماژەش بەوە دراوە کە ئەگەر محەمەد بن سەلمان رۆڵی لەو دۆسێیەدا بسەلمێنرێت، ئەوا دەبێتە مایەى شەرمەزاریی بۆ ئیدارەكەى دۆناڵد ترەمپ، بەهۆى ئەوەى تائێستا بەدووری دەزانێت گرێبەستى چەك لەگەڵ سعودیە رابگرێت.

 

لەو بارەیەشەوە ترەمپ رایگەیاندووە: وەستاندنى فرۆشتنى چەكى ئەمریكا بە سعودیە بەهۆى دیارنەمانى خاشقچىیەوە "زۆر ئەستەمە".

 

ترەمپ، لەمیانەى چاوپێكەوتنێكیدا لەڕێى تەلەفۆنەوە لەگەڵ فۆكس نیوز وتوویەتی: "باوەڕم وایە كە زیانمان پێ دەگات".

 

لەبارەی دیارنەمانى ئەو رۆژنامەنووسەشەوە ئەوەى خستووەتەڕوو: كارێكى قێزەونە، دەڵێت ئەگەر كوژرانى خاشقچى پشتڕاست ببێتەوە ئەوا بەدڵنیاییەوە ئیجابى نابێت بۆ پەیوەندییەكانى ئەمریكاو سعودیە.

 

پێشتریش سەرۆكى ئەمریكا داواى روونكردنەوەى "لەسەر ئاستى باڵا" لە سعودییەکان كردووە دەربارەى چارەنووسى خاشقچى و وتوویەتی: زیاتر لە جارێك لەگەڵ سەرانى سعودیە دەربارەى دیارنەمانى ئەو رۆژنامەنووسە قسەى كردووە.
















زۆرترین بینراوەکان