لەسەر درەنگ پێدانی چەك و دواكەوتنی موچە دارایی ڕونكردنەوە دەدات


نەتەوە  |   13:07:28 2018-10-09  |   (1,943) جار خوێندراوەتەوە

دارایی سەبارەت بە "دواكەوتنی چەكی فەرمانگەكان لەگەنجینەكان" و درەنگ وەرگرتنی موچەكانیان لەڕۆژی دیاریكراوی خۆیاندا ڕونكردنەوە دەدات، بەڕێوەبەری گەنجینەی یەك لەسلێمانیش زانیاری زیاتر لەوبارەیەوە ئاشكرادەكات.
A+    A-

 

حەسەن ڕەشید، بەڕێوەبەری گەنجینەی یەك لەپارێزگای سلێمانی لەلێدوانێكدا بۆ سایتی تۆڕی هەواڵی سلێمانی ڕاگەیاندوە، "ڕۆژانە بەردەوام لەكاتژمێر ٨:٣٠ی سەرلەبەیانییەوە گەنجینە كاری فەرمانبەران ڕایی دەكات و  فەرمانبەری ھەر دامەزراوەیەكیش كە سەردانی گەنجینە دەكات، دوای ڕاییكردنی مامەڵەكانیان لەزوترینكاتدا چەكیان پێدەدرێت".


ناوبراو وتیشی:"جگەلەوەش كاتێك پێمان ڕادەگەیەنرێت، كە چەك بدرێتە فەرمانبەرانی ھەر وەزارەتێك، مانای وایە پارەی پێویست لەبەردەستدایە كە موچەی ئەو وەزارەتە بدرێت".


ڕونیشیكردەوە، "زۆركات دابەشكردنی چەكی موچە، كە درەنگ دەدرێتە فەرمانبەران، ھۆكارەكەی پەیوەندیی بەوەوە ھەیە، ئێمە كاتژمێر ٨:٣٠ی سەر لەبەیانی دەوامیی ئاسایی خۆمان دەكەین و كاری فەرمانبەران ڕایی دەكەین و چەكیان پێدەدەین".


زیاتر لەوبارەیەوە ئاماژەی بەوەدا، بەڵام  فەرمانبەری ئەو فەرمانگەیەی كە چەكی پێدەدرێت خۆی كاتژمێر ٩ی سەرلەبەیانی یاخود درەنگتر سەردانیان دەكات، ئەوەش وادەكات تا ڕێكارە ئیداریی و یاساییەكانی بۆ تەواو دەكرێت ماوەی یەك كاتژمێری بوێت.


ئاشكراشیكرد، "زۆری ژمارەی دامەزراوەكانیش وادەكات پرۆسەكە دوابخات، ئەگەرنا فەرمانبەرەكانمان لەزوترین كاتدا كاری موچەخۆران ڕاییدەكەن، بۆ نمونە كاتێك دابەشكردنی موچەی پەروەردە ڕادەگەیەنرێت، نزیكەی ١٤ بەڕێوەبەرایەتیە كە بەشێك لە فەرمانبەرانی ئەو بەڕێوەبەرایەتیانە خۆیان درەنگ تر سەردانی ئێمە دەكەن و ئەوەش وادەكات نەتوانرێت بەیەكەوە چەكی موچەیان پێبدرێت".


بەوتەی حەسەن ڕەشید:"لەكاتی دابەشكردنی موچەدا ئێمە ھەوڵدەدەین لەزووترین كاتدا موچەی تەواوی فەرمانبەران دابین بكەن و مامەڵەكانیان ڕایی بكەین و چەكیان پێبدرێت".
 
















زۆرترین بینراوەکان