بڕیار لەسەر گواستنەوەی راژەی فەرمانبەران دەدرێت


نەتەوە  |   10:06:14 2018-09-25  |   (3,863) جار خوێندراوەتەوە

بەپێی چەند نوسراوێكی وەزارەتە جیاجیاكان، لە كاتی "داواكردنی گواستنەوەی فەرمانبەران" ئاشكرا كراوە، "بەفەرمانی ئەنجومەنی وەزیران گواستنەوەی ڕاژە ڕاگیراوە، تكایە هیچ فەرمانبەرێك داوای گواستنەوەی ڕاژەكەی نەكات".
A+    A-

 

بەبریاری سەرۆكایەتی ئەنجومەنی وەزیران ژمارە 910 لە 22/7/2016،ـەوە بە پێی رێنمایی 16ی ساڵی 2016ی وەزارەتی دارایی گواستنەوەی راژە ڕاگیراوە.


لە نوسراوێكی دیوانی ئەنجومەنی وەزیرانی حكوومەتی هەرێم ئاماژە بەوەكراوە، راگرتنی گواستنەوەی راژەی فەرمانبەران بەردەوام دەبێت، تاوەكو سەرەتایی ساڵی داهاتوو و"لەگەڵ تەواوبوونی قۆناغی دووەمی سیستەمی بایۆمەتری، گواستنەوەی راژەی فەرمانبەران لەدامودەزگاكانی حكوومەتی هەرێم ناكرێتەوە".


لە نووسراوەكەدا جەختیشكراوەتەوە، "گواستنەوەی راژە لەنێو یەك دامودەزگای حكوومی كەهەمان یەكەی ژمێریارییان هەیە و بەشێوەكی ئاسایی بەردەوام دەبێت و تەنسیبكردنیش لەنێو وەزارەت و فەرمانگە حكومییەكان بەستراو و نەبەستراوەكانیش بەردەوام دەبێت بەپێی رێنماییەكان".


بەپێی ڕێنماییەكی وەزارەتی ناوخۆی حكوومەتی هەرێم گواستنەوەی ڕاژە لەسەر میلاكی سەربازی بۆ سەر میلاكی شارستانی، ناكرێت، هەروەكو چۆن گواستنەوەی ڕاژە لەسەر میلاكی شارستانی بۆ سەر میلاكی سەربازیش بە هەمان شێوە ئەنجام نادرێت.


لەوبارەیەوە نەورۆز قازی، سەرۆكی فەرمانگەی یاسایی ئەنجومەنی وەزیرانی كوردستان بەهەفتەنامەی (باس)ی راگەیاند بەهۆی رێكخستنەوەی میلاكاتەوە حكوومەت گواستنەوەی راژەی لە نێوان وەزارەتەكان راگرتووە و "حكوومەت ئێستا خەریكی رێكخستنەوەی میلاكاتە، وەزارەت و فەرمانگەمان میلاكی خۆیان ناردووە و ئێمەش دەمانەوێت میلاكات دابەش بكەین بەسەر فەرمانگەكاندا، بۆ نمونە شوێنێك 90 فەرمانبەری هەیە و شوێنێكی تر7 فەرمانبەری هەیە ئەو شوێنەی پێویستی بێت ئەوە فەرمانبەری بۆ دەگوازینەوە".


رونیشیكردەوە، وەزارەتەكان پێداویستی میلاكی خۆیان بۆ ناردوون و ئێستا سەرقاڵی داڕشتن و دابەشكردنەوەی میلاكن، "لەگەڵ رێكخستنی میلاكات وەسفی وەزیفی رێكدەخەینەوە، چونكە سەدان فەرمانبەر هەیە وەسفی وەزیفیان نیە، هەیە ناونیشانی نوسراوە كەچی شۆفێرە، بۆیە تاوەكو میلاك تەواو نەبێت گواستنەوە ناكرێتەوە،بەڵام فەرمانبەران دڵنیا دەكەمەوە وەستانەكە كاتیە".


وتیشی: زۆربەی فەرمانبەری وەزارەتەكان دەیانەوێت بگوازرێنەوە بۆ وەزارەتی خوێندنی باڵا تەنها لەبەر ئەوەی دەرماڵەی زۆریان هەیە، قوتابی تواناسازی هەیە نێردراوەتە دەرەوە بەڵێننامەی پڕكردۆتەوە تاوەكو 5 ساڵ خزمەتی وەزارەتەكەی بكات، بەڵام كە تەواوی دەكات دەیەوێت خۆی بگواێتەوە بۆ خوێندنی باڵا، فەرمانبەرانی ناوخۆ دەیانەوێت بگوازرێنەوە بۆ وەزاەرتی پێشمەرگە چونكە پاشەكەوتیان كەمە".
 
















زۆرترین بینراوەکان