ئەم جۆرە قە‌ڵە‌م و كاغە‌زە تایبە‌تە لە‌دە‌نگداندا بە‌كاردە‌ەێنرێت


نەتەوە  |   19:49:32 2018-09-24  |   (100) جار خوێندراوەتەوە

بڕیاردەرى ئەنجومەنى كۆمسیاران رایدەگەیەنێت: لە رۆژى دەنگداندا قەڵەم و كاغەزێكى تایبەت بۆ رێگریى لە ساختەكاریى بەكاردەهێنرێت و دەڵێت: "قەڵەمەكە دواى هەڵبژاردن دەگەڕێنرێتەوە بۆ كۆمسیۆن و ئەو كاغەزانەى دەمێنێتەوە لەناودەبرێن".
A+    A-


شیروان زرار، وتەبێژی ئەنجومەنى كۆمسیاران بە سایتی دواڕۆژ-ى راگەیاندووە: سەرجەم ئامادەكارییەكان بۆ هەڵبژاردن تەواوكراوەو ئەو كەلوپەل و ئامێرانەشى كە لەلایەن كۆمسیۆنەوە كڕدراون، گەیشتوونەتە هەرێم و لەكۆگاكاندا دانراون.

 

دەشڵێت: "ئەو كاغەزەى لە دەنگداندا بەكاردەهێنرێت لە ئەڵمانیا بەرهەمهێنراوەو پەڕەیەكی كانزاییە و جیاوازە لە پەڕەی ئاسایی و ئامێرێكى دڵنیایشی لەگەڵدایە كە ژمارەیان 100 دانەیەو ئەگەر گومان لە پەڕەكە هەبێت لەڕێگەى ئامێرەكەوە پشكنینی بۆ دەكرێت و بە لێكردنەوەی بەشێك لە پەڕەی دەنگدانەكە دەخرێتە ناو ئامێرەكەوەو ئەگەر خوێندییەوە ئەوا پەڕەكە كێشەی نییەو ئەگەریش نەیخوێندەوە ئەوا دیارە كە ساختەیە".

 

لەلایەکی دیکەشەوە ئیسماعیل خورماڵى، بڕیاردەرى كۆمسیۆنەکە  دەڵێت: "ئەو قەڵەمەى ئەمجارە بەكاردەهێنرێت لە دەنگداندا، قەڵەمێكى تایبەتە و نابێت جگە لە كارمەندانى كۆمسیۆن بەدەست هیچ كەسێكى ترەوە بێت، هەروەها دواى هەڵبژاردن دەبێت سەرجەم قەڵەمەكان بگەڕێنەوە بۆ كۆمسیۆن تا ساختەكاریى نەكرێت و دەنگدانیش جگە لەو قەڵەمە نابێت بەهیچ قەڵەمێكى تر بدرێت".

 

لەبارەى كاغەزى دەنگدانەکەشەوە، ئەو بەرپرسەى كۆمسیۆن، وتى: "كاغەزەكە ساختەكاریى تێداناكرێت، چونكە كاغەزێكى ئاسایى نییە و كۆپى ناكرێت، بەڵام بۆئەوەى ساختەكاریى نەكرێت بڕیارمانداوە سەرجەم ئەو كاغەزانەى دەمێننەوە لە بنكە و وێستگەكاندا لەناوبرێن".
















زۆرترین بینراوەکان