سەرکردایەتیی یەکێتی هەڵوێستی فەرمی لەبارەی یەکگرتنەوە لەگەڵ قەوارەکەی بەرهەم ساڵح ئاشکرا کرد


نەتەوە  |   17:58:02 2018-09-13  |   (201) جار خوێندراوەتەوە

ئەنجومەنی سەركردایەتی یەكێتی  دوای کۆبوونەوەی نائاسایی ئەمڕۆی راگەیاندراوێكی بڵاوکردەوە کە تەوەرێکی تایبەت بووە بە  راگەیاندنی هەڵوێستی فەرمی ئەو حزبە لەبارەی گفتوگۆ لەگەڵ هاوپەیمانی بۆ دیموكراسی و دادپەروەری بەمەبەستی یەكگرتنەوە.
A+    A-

 

دوای ئەوەی پێشنیوەڕۆی ئەمڕۆ پێنجشەممە ئەنجومەنی سەرکردایەتیی یەکێتی نیشتمانیی کوردستان لە بارەگای مەکتەبی سیاسییەکەی لە سلێمانی کۆبوونەوەیەکی نائاسایی کرد، لە راگەیەندراوێکدا تەوەرە سەرەکییەکانی کۆبوونەوەکە ئاشکرا کرا کە گرنگترینیان بریتی بووە لە بەشدارییکردن لە پرۆسەی سیاسیی عیراق و هەڵبژاردنی پەرلەمانی کوردستان و پرسی ئیدارەی کەرکوک و دەستپێشخەریی بۆ گفتوگۆ لەگەڵ  قەوارەی هاوپەیمانیی بۆ دیموکراسی و دادپەروەریی بەمەبەستی زەمینەسازیی بۆ یەکگرتنەوەی یەکێتی و ئەو قەوارەیە کە بەرهەم ساڵح-ی جێگری پێشووی یەکێتی سەرۆکایەتیی دەکات.

 

ئەمەش دەقی راگەیاندراوەكەی ئەنجومەنی سەرکردایەتیی یەکێتییە:

 

 

راگەیەندراوی رۆژنامەوانی لەسەر كۆبوونەوەی

ئەنجومەنی سەركردایەتیی یەكێتیی نیشتمانیی كوردستان

 

"ئەمڕۆ نیوەڕۆ (13/9/2018) ئەنجومەنی سەركردایەتی یەكێتیی نیشتمانیی كوردستان، بەسەرپەرشتی كۆسرەت رەسوڵ عەلی، جێگری سكرتێری گشتی (ی.ن.ك) سەبارەت بە (دۆخی عێراق، هەڵبژاردنی كوردستان‌و داوای هاوپەیمانی بۆ دیموكراسی‌و دادپەروەری بۆ یەكگرتنەوە لەگەڵ یەكێتی) كۆبونەوەی نائاسایی كرد.

كۆبونەوە، دوا وردەكاری دۆخی عێراق، كۆبونەوەی یەكێتی‌و پارتی، هەڵبژاردن، پرسی كەركوك، جارێكی تر هەڵسەنگاندەوە. سەرەنجام:

ئاماژەی گۆڕانكاریەكانی لەبۆچونی لایەنەكانی شیعەو سوننە، بۆ دروستكردنی كوتلەی گەورەو چۆنیەتی هەڵبژاردنی سەرۆكی ئەنجومەنی نیشتمانی عێراق‌و جێگرەكانی، بەگۆڕانكاری باش زانی‌و پێی باش بوو، وەفدی هاوبەشی كوردستانی، ئەم گۆڕانكاریانە لەناو بلۆكی فراكسیۆنەكان، بۆ بەشدارییەكی كارا بقۆزێتەوە كە كاندیدێكی شایستە بۆ سەرۆكی كۆماری عێراق‌و سەرۆك وەزیران‌و پاشان، پەسەندكردنی پرۆژەی یەكێتی‌و پارتی، لەسەری رێك بكەوین.

سەبارەت بە سەرەنجامی هەڵبژاردن‌و پرسی كەركوكیش، كۆبونەوە جەختدەكاتەوە كە:

 

حكومەتی مەدەنی بگەڕێتەوە كەركوك‌و ناوچە جێناكۆكەكانی مادەی (140). پیشمەرگەو ئاسایش‌و پۆلیسی ئیتحادی، پێكەوە ئاسایشی كەركوك‌و ناوچەكان بگرنەدەست. ئەمەش، لەروانگەی یەكێتییەوە، بەستراوە بەوەی كە بەپێی شایستەیی دواهەڵبژاردن، پارێزگاری كەركوك هەڵبژێرێ‌. ئەویش تەنها پارێزگاری كاندیدكراوی یەكێتیی نیشتمانیی كوردستانە.

بۆ بڕیاری هاوپەیمانی بۆ دیموكراسی‌و دادپەروەریش، لەگەڵ یەكێتی دەست بە گفتوگۆ بكەن بۆ یەكگرتنەوە، سەركردایەتی پیشوازی لەم دەستپێشخەرییە كردو، وەفدێكی باڵای بۆ لێكتێگەیشتن‌و سەرەنجام یەكگرتنەوە، پێكهێنا.

بۆ هەڵبژاردنی كوردستانیش، دەستخۆشیی لە دەستپێكی هەڵمەتی هەڵبژاردن لەدەروازەی راپەڕین كردو بڕیاریشی دا، بۆ سەرخستنی هەڵمەتی هەڵبژاردن، بەرپرسی سەرجەم ئۆرگانە باڵاكانی یەكێتی كۆببنەوەو بەرنامەی چۆنیەتی دابەشكردنی تەواوی كادرو ئەندامانی یەكێتی دابڕێژن. دەزگاكانی راگەیاندنی یەكێتیش، بەجۆش‌و خرۆشتر هەڵمەتی هەڵبژاردنەكەو چالاكی سەرۆكی لیستی (105)و كاندیدە دڵسۆزو مەدەنیخوازەكانی یەكێتی، روماڵ بكەن.

ئەنجومەنی سەركردایەتی

یەكێتیی نیشتمانیی كوردستان

13/9/2018
















زۆرترین بینراوەکان