چیرۆكی ئه‌و گه‌نجه‌ی له‌لایه‌ن هاوسه‌ره‌كه‌یه‌وه‌ كوژرا


نەتەوە  |   18:39:32 2018-08-10  |   (6,015) جار خوێندراوەتەوە

هێشتا تەرمەكەی "محەمەد شێركۆ" لەزەویدابوو، فاتیمەی هاوسەری لەبەردەم ئاسایشی چەمچەماڵ دانی بەكوشتنی مێردەكەیدا نا.
A+    A-

 

فاتیمە دوای كوشتنی هاوسەرەكەی لە كەركوك هەوڵیدابوو لەڕێگەی چەمچەماڵ-ەوە هەڵبێت، بەڵام بەهۆی هەڵگرتنی دەمانچە و حەربەیەكەوە لەبازگەكەی (بانیمەقان) لەلایەن ئاسایشەوە دادەبه‌زێنرێت و لەیەكەم ساتەكانی لێكۆڵینەوە لەگەڵیدا لەبارەی هۆكاری هەڵگرتنی دەمانچەكەوە دانیناوە بەكوشتنی هاوسەرەكەیدا.


كاتژمێر 8ی شەوی پێنجشەممە 9ی ئاب، بنكەی پۆلیسی ئازادی لەبونی رووداوێكی كوشتن لەگەڕەكی ئازادی شاری كەركوك ئاگاداردەكرێتەوە، دوای گەیشتنی پۆلیسی بنكەی ئازادی و تیمی نەهێشتنی تاوان و بەڵگەی تاوانەكان بۆ شوێنی رووداوەكە دەبینن تەرمێك لەنێو ماڵێكی گەڕەكەكەدایە، بەڵام بەهۆی بوونی نارنجۆكێك لەنزیك تەرمەكە ناچاردەبن داوای هاوكاری لەتیمی پوچەڵكردنەوەی بۆمب و ( k9) بكەن.


له‌وباره‌یه‌وه‌ فەرهاد مەحمود، بەڕێوەبەری بنكەی پۆلیسی ئازادی رایگه‌یاندووه‌، "لەساتەكانی یەكەمدا توانیمان لەرێگەی ماڵە دراوسێكانەوە ناسنامەی كوژراوەكە ئاشكرابكەین كە ناوی (محەمەد شێركۆ )یە ناسراو بە (حەمە چاوشێنە) و تەمەنی 21 ساڵبوو.


وتیشی "تەرمەكە روتكرابووە، هیچ جلوبەرگێك لەبەریدا نەمابوو، شوێنەواری لێدانێك بەپشت سەریه‌وه‌ بوو كە دواتر لەرێگەی پزیشكی دادوەرییەوە دەزانرێت شوێنەواری فیشەك بووە یاخود پارچە شوشه‌یه‌ك، هەروەك نایلۆنێكیش پێچرابوو به‌ سەرییه‌وە تاوەكو رێگریبكرێت لەرۆیشتنی خوێنەكەی و تەرمەكەیش خرابووە نێو پارچە چەرچەفێكی سپییەوە و ئامادەكرابو بۆ فڕێدان و شاردنەوەی تاوانەكە".


ئاماژه‌ی به‌وه‌شكرد، تەواوی جلوبەرگ و ئەو كەلوپەلانەی شوێنەواری تاوانەكەی لەسەر بەجێهێڵدرابوو خرابووە ناو كیسەیەكەوە، لەتەنیشت تەرمەكە دانرابوو، بەڵام دیاربوو ئەنجامدەرانی تاوانەكە فریا نەكەوتبوون كە تاوانەكەیان بشارنەوە و هەڵاتبوون.


ئه‌وه‌شی خسته‌ڕوو، محەمەد شێركۆ لەدایكبوی ساڵی 1997 بووە، پێشتر كارمەند بووە لەهێزەكانی بەرگری فریاكەوتنی سەر بەحكومەتی هەرێم، لەئێستادا دیارنیە چی پیشەیەكی دیكەی هەبووە.


محەمەد و فاتیمە ماوەی دوو ساڵبووە چونەتە ژیانی هاوسەرگیرییەوە و بەوتەی ماڵە دراوسێكانیشیان زۆربەی كات شەڕ و كێشە لەنێوانیاندا هەبووە بەتایبەت لەماوەی دواییدا.


كاتێك هێزە ئەمنییەكانی كەركوك سەرقاڵی لێكۆڵینەوە بوون لەرووداوەكە، هێشتا تەرمەكەیان هەڵنەگرتبوەوە، لەلایەن هێزە ئەمنییەكانی سنوری پارێزگای سلێمانییەوە ئاگاداردەكرێنەوە كە كەسێكیان دەستگیركردووە، دانیناوە بەكوشتنی پیاوەكەی خۆی كە دواتر دەركەوت هەردوو رووداوەكەی پەیوەندیان بەیەكترەوە هەیە.


هاوكات عەمید ئەفراسیاو كامیل، وتەبێژی پۆلیسی كەركوك بە دواڕۆژ ی وت "هەر شەوی رووداوەكە لەلایەن ژوری ئۆپراسیۆنی هێزە ئەمنییەكانی سلێمانی پەیوەندی بەپۆلیسی كەركوكەوە كرا كە ئاسایشی چەمچەماڵ ژنێكیان دەستگیركردووە، دانیبەوەداناوە كە هاوسەرەكەی خۆی كوشتووە لەكەركوك و هەڵاتووە".


بەوتەی عەمید ئەفراسیاو، فاتیمە ئیبراهیم لەداكیبوی ساڵی 2000 بەهۆی هەڵگرتنی دەمانچە و حەربەیەكی سەربازییەوە لەلایەن ئاسایشی بازگەی چەمچەماڵ-ەوە گومانی كەوتوەتەسەر و دوای لێكۆڵینەوە لەگەڵیدا دەركەوتووە هاوسەرەكەی خۆی كوشتووە واتا ( محەمەد شێركۆ ).


هاوكات بەپێی زانیارییەكان، هێشتا ژنە دەستگیركراوەكەی لای ئاسایشی چەمچەماڵ-ه و رادەستی پۆلیسی كەركوك نەكراوە.


لای خۆشیه‌وه‌ فەرهاد مەحمود، بەڕێوەبەری بنكەی پۆلیسی ئازادی زانیاری زیاتری لەو بارەیەوە به‌سایتی دوارۆژی راگه‌یاندووه‌، "بەهۆی ئەوەی پەڕاوی لێكۆڵینەوە بۆ دەستگیركردنی ژنەكە لەلایەن دادوەری ئێشكگرەوە كراوەتەوە، بۆیە دەبێت چاوەڕێی رۆژی یەكشەممە بكەین تاوەكو دادوەر دۆسییه‌كەی رەوانەی دادگای كەركوك بكات".


هەرچەندە بەپێی لێكۆڵینەوە سەرەتاییەكان دەركەوتووە پێدەچێت زیاتر لەكەسێك بەشداری لەتاوانی كوشتنی محەمەد شێركۆ كردبێت، بەڵام بەهۆی رادەستنەكردنەوەی ژنەكە بەپۆلیسی كەركوك هێشتا هۆكار و چۆنێتی كوشتنەكەی ئاشكرانەبووە.
















زۆرترین بینراوەکان