لەبارەی مانگ گیرانەکەی ئەمشەوەوە کەشناسی  زانیاریی ورد ئاشکرا دەکات


نەتەوە  |   19:00:51 2018-07-27  |   (650) جار خوێندراوەتەوە

بەڕێوبەری بەشی راگەیاندنی کەشناسی هەرێم لەبارەی مانگ گیرانەکەی ئەمشەوەوە رایگەیاندووە ئەمشەو درێژترین مانگ گیران لە ماوەی ئەم سەدەیەدا روودەدات و لە کوردستانیش لەدوای 9:24 خولەکەوە دەستپێدەکات و زیاتر لە پێنج کاتژمێریش بەردەوام دەبێت.
A+    A-


ئەژی چەتۆ، لەوبارەیەوە روونکردنەوەی زیاتری داوە بە خەندان و رایگەیاندووە: کاتژمێر 8:14 خولەک مانگ گیرانەکە دەستپێدەکات، بەڵام تا کاتژمێر 9:24 خولەکی شەو بەتەواوی لە کوردستاندا هەستی پێناکرێت لەبەرئەوەی کە لەو کاتەدا مانگ دەچێتە ناوچەیەکی تاریک و وردە وردە لە بەشی چەپی مانگەوە مانگ گیرانەکە دەستپێدەکات.

 

دەشڵێت: کاتژمێر 10:23 خولەکی تەواو مانگیرانەکە تەواو هەستی پێدەکرێت و لەوکاتەدا خەپلەی مانگ دەچێتە ناو سێبەری تەواوی زەوی و رەنگێکی سووری دەبیت و کاتژمێر 11:21 خولەک مانگ گیرانی تەواوەتی دەبێت و ئەوکات رەنگی مانگ سوورێکی تۆخە و دیمەنەکە زۆر ناوازەو دەگمەنەو تا کاتژمێر 12:13 خولەک ئەو قۆناغە بەردەوام دەبێت.

 

روونیشیکردووەتەوە کە دوای ئەوەش مانگ گیرانی تەواو وردە وردە کۆتایی پێدێت و لە کاتژمێر 1:19ی پاش نیوەشەو نیمچە مانگ گیران تەواودەبێت و مانگ بەتەواوی لە سێبەری زەوی دەردەچێت، بەڵام تا کاتژمێر 2:28 خولەکی بەیانی بە تەواوی دیاردەکە کۆتایی پێدێت.

 

سەبارەت بە زیانەکانی مانگ گیرانیش دەڵێت: هیچ زیانێکی نییە، هیچ گۆڕانکارییەک بەسەر کەشوهەوادا نایەت، مانگ هیچ پەیوەندیی بە بەرزە هەوای زەوییەوە نییەو هیچ پەیوەندییەکیشی بە جووڵەی زەوی و کیشوەرەکانەوە نییە، بۆیە لەوکاتەدا بوومەلەرزە روونادات بەهۆی مانگ گیرانەوە، بەڵام ئەوە دەبێت لەبەرچاو بگرین بومەلەرزە کاتی روودانی دیارنییە، تەنها رووداوێکی سروشتییە هەرکات رووبدات روودەدات و پێشبینی روودانی ناکرێت.

 

داواشی لە هاووڵاتیان کردووە کە دووربینی دووچاو بەکاربهێنن زۆر باشە بۆ سەیرکردنی مانگ و زۆر گەورەی دەکات، هاووڵاتیان بەهۆیەوە دیمەنێکی جوان دەبینن، نەک تەلیسکۆب، چونکە تەلیسکۆب زۆر گەورەی دەکات.

 

ئاماژەشی بەوەداوە کە مانگ گیرانەکە لە هەریەک لە وڵاتانی ئەمریکای باکوور و کەنەدا و بەشێک لە خۆرئاوای ئەمریکای باشوورو خۆرهەڵاتی ئاسیادا نابینرێت، بەهۆی ئەوەی لەو وڵاتانەدا رۆژەو مانگیرانیش کە روودەدات لە شەودا هەستی پێدەکرێت.
















زۆرترین بینراوەکان