یەكەم وەزارەتی هەرێم كاركردن بە سیستمی ئەلەكترۆنی رادەگەیەنێت


نەتەوە  |   17:31:36 2018-06-13  |   (101) جار خوێندراوەتەوە

وەزیری خوێندنی باڵاو توێژینەوەی زانستی ڕایدەگەیەنێت: "وەزارەتەكەی بۆ كارئاسانی هاووڵاتیان، سیستمی بە ئەلەكترۆنیكردنی وەزارەت پەیڕەو دەكات، دەشڵێت: “دەبێتە چارەسەری نەهێشتنی رۆتین لە راییكردنی مامەڵەی هاووڵاتیاندا".
A+    A-


لە كۆبوونەوەیەكی ئەنجومەنی وەزارەتی خوێندنی باڵای هەرێمداو بە ئامادەبوونی د.یوسف گۆران، وەزیری خوێندنی باڵا د. خەتاب شێخانی بەڕێوەبەری گشتی فەرمانگەی كارگێڕی و دارایی و د. داود سلێمان بەڕێوەبەری گشتی ئەندازەو پڕۆژەكان، وردەكاریی پڕۆژەی بە ئەلەكترۆنیكردنی وەزارەت روونكرایەوە.

 

بەڕێوەبەری گشتی فەرمانگەی كارگێڕی و دارایی لەوبارەیەوە رایگەیاندووە: وەزارەت لەمەودوا لە رێگەی ئەپڵیكەیشنێكی مۆبایلەوە كاروباری هاووڵاتیان رادەپەڕێنێت، ئەوەش خۆی لە ئەپڵیكەیشنێكی مۆبایلدا دەبینێتەوە، كە چوار بەشی سەرەكیی تێدایە بۆ چاودێریی و بەدواداچوونی مامەڵەی هاووڵاتیان (بەدواداچوونی نووسراو)، هەروەك زانیاریی و داتا لەبارەی فەرمانبەرانی وەزارەتی خوێندنی باڵا (زانیاری كەسی) و هەواڵ و چالاكییەكانی وەزارەت (هەواڵ) و ناردنی پەیام لە وەزارەتەوە بۆ فەرمانبەر بۆ ئاگاداربوون لە دواین بڕیارو راسپاردەكان.

 

دەشڵێت: "ئەم ئەپڵیكەیشنە كەناڵێكی فەرمی وەزارەتی بۆ فەرمانبەران لەخۆگرتووەو سیستمەكە بەشێوەیەكی گشتی شەش بەش لەخۆ دەگرێت، كە تایبەتە بە فەرمانبەران و هاووڵاتیان و راییكردنی مامەڵەكان، بەشە ئەلەكترۆنییەكانیش بریتین لە: (سەرچاوە مرۆییەكان، ژمێریاری، نووسراوەكان، سكۆڵەرشیپ، داتاو زانیاریی خوێندكاران و قوتابیان و یەكسانكردنی بڕوانامەكان".

 

هاوكات د.یوسف گۆران، وەزیری خوێندنی باڵاو توێژینەوەی زانستی رایگەیاندووە، جێبەجێكردنی ئەو سیستمە گەڕانەوە نییەو ئێمە رێگەیەكی دروستمان گرتۆتەبەر بۆ خزمەتی هاووڵاتیان، بە جێبەجێكردنی سیستمی بە ئەلەكترۆنی كردنی وەزارەت و چیتر پێویست ناكات هاووڵاتی بۆ راییكردن و بەدواداچوونی مامەڵەكانیان كاتی زۆر بە رۆتینی كارگێڕیی بەسەربەرن، بەڵكو لەڕێگەی ئەپڵیكەیشنێكی تایبەتی مۆبایلەوە دەتوانێت بچێتە ناو سیستمەكەو تەواوی زانیارییەكانی لەبارەی مامەڵەكەیەوە بزانێت.
















زۆرترین بینراوەکان