کۆچی پێچەوانە لە ئەوروپاوە دەستیپێکردەوە


نەتەوە  |   17:58:16 2018-04-13  |   (2,387) جار خوێندراوەتەوە

کەناڵێکی ئەڵمانی رایدەگەیەنێت: "شەپۆلێکی کۆچکردنی پێچەوانە دەستیپێکردووە، بەڵام  ئەمجارەیان کۆچەکە لە ئەڵمانیاوەیە بەرەو تورکیا.
A+    A-


لەوبارەیەوە کەناڵی (ARD)  ئەڵمانی  ئاشکرای کردووە بەشێکی زۆر لەو ئاوارە سورییانەی لە تورکیاوە کۆچیان کردووە بۆ ئەڵمانیاو مۆڵەتی مانەوەیان لەو وڵاتەدا پێدراوە، بەڵام ناتوانن لەگەڵ ئەندامانی خێزانەکانیاندا یەکبگرنەوە، بۆیە بەرەو تورکیا دەگەڕێنەوە.

 

ئاماژەشی بەوە کردووە، هاووڵاتییە سورییەکان نایانەوێت ڤیزا وەرگرن و بەڕەسمی بگەڕێنەوە بۆ تورکیا، بۆیە پەنایان بردۆتە بەر رێگەی قاچاغ و بە هاوکاریی قاچاغچی دەگەڕێنەوە ناو تورکیا.

 

لەو رووەشەوە پەیامنێری کەناڵەکە کە یاوەریی کۆمەڵێک لەو کۆچبەرە سورییانەی کردووە کە لە ئەڵمانیاوە بەرەو تورکیا گەڕاونەتەوە، لەزاری قاچاغچییەکانەوە ئاشکرایان کردووە کە رۆژانە زیاتر لە 50 کەس لە ئەڵمانیاوە دەگەڕێنەوە تورکیاو ژمارەیان لەوانە زیاترە کە رۆژانە لە تورکیاوە کۆچ دەکەن بەرەو ئەوروپا.

 

هەر سەبارەت بەو بابەتەش دۆمینیک بارچ، نوێنەری کۆمیساریای باڵای پەنابەرانی سەربە نەتەوەیەکگرتوەکان لە ئەڵمانیا بە کەناڵەکەی راگەیاندووە، ئەویش ئەو رووداوەی بیستووە، بەڵام دڵنیا نییە لەبارەی ژمارەی راستەقینەی ئەو کەسانەوە کە دەگەڕێنەوە بۆ تورکیاو دەشڵێت: "ئەوە نیشانەی ئەوەیە کە ئەڵمانیا مافی پرەنسیپی پاراستنی خێزانەکانی پەنابەرانی دابین نەکردووە".
















زۆرترین بینراوەکان