له‌ به‌غداوه‌ هه‌وڵ بۆ موچه‌ی خانه‌نشینانی هه‌رێم ده‌درێت


نەتەوە  |   00:21:26 2018-02-13  |   (2,284) جار خوێندراوەتەوە

دوو هەوڵ لە بارەی چارەسەركردنی موچەی خانەنشینانی هەرێم لە بەغداوە ئاشكرا ده‌كرێت، كە خۆیان لە "هاوتاكردنی موچە و گواستنەوەی موچەی بەشێك لە خانەنشینان بۆسەر بەغدا دەبیننەوە".
A+    A-

 

زانا رۆستایی، ئەندامی لیژنەی یاسایی ئەنجومەنی نوێنەرانی عیراق لە میانی به‌رنامه‌یه‌كی رادیۆ نه‌وا رایگه‌یاندووه‌: "لەئێستادا حكومەتی فیدراڵ هاندەدەین لەسەرئەوەی سیاسەتێكی دارایی ناوەندی پەیڕەو بكات، چونكە بەپێی دەستوریش سیاسەتی دارایی ناوەندیە، بۆئەوەی بە جۆرێك بێت جیاوازی لەنێوان موچەی خانەنشینان و فەرمانبەرانی هەرێم لەگەڵ پارێزگاكانی تری عیراقدا نەبێت".


ئەو پەرلەمانتارە كوردە ئاشكراشیكرد، یاداشتێكیان ئاڕاستەی وەزارەتی دارایی و ئەنجومەنی وەزیرانی عیراق كردوە، بۆئەوەی موچەی ئەو فەرمانبەرانەی هەرێم كە پێش راپەڕین خانەنشینكراون، بخرێتەوە سەر بەغدا، چونكە مانگانە پارەیەكیان بۆ خانەنشینی لێبڕاوە و خراوەتەسەر سندوقی خانەنشینی عیراق، بۆیە لەئێستادا ئەركی حكومەتی عیراقە موچەكانیان پێبدات.


زانا رۆستایی دەربارەی ئەنجامی ئەو هەوڵانەش وتی "لیژنەی دارایی پشتگیری یاداشتەكەیان كردوە و تائێستا چاوەڕێی وەڵامی فەرمین، بەڵام چارەسەركردنی كێشەی موچەی ئەو بەشە لە خانەنشینان رەنگە ئاسانتر بێت لەو كەسانەی لە دوای راپەڕینەوە خانەنشینكراون".
 
















زۆرترین بینراوەکان