وردەکاری رووداوەکانی شەوی رابردووی کەرکوک


نەتەوە  |   16:44:55 2018-01-12  |   (255) جار خوێندراوەتەوە

شەوی رابردوو چەند رووداوێکی جیاواز لە کەرکوک روویانداوە کە دیارترینیان هێرشی چەکداری بوو بۆ سەر هێزەکانی دژەتیرۆرو رفاندنی 5 هاووڵاتی کورد.
A+    A-


لەوبارەیەوە بەوتەی سەرچاوەیەک لە پۆلیسی قەزاو ناحییەکانی کەرکوک،  شەوی رابردوو پێنجشەممە 2018/1/11 لە سەر رێگەی لەیلان - چیمەن هێرشکراوەتە سەر هێزێکی هاوبەشی فەوجی سێی سواتی کەرکوک و دەزگای دژەتیرۆری عیراق.

 

سەرچاوەکە روونیکردۆتەوە کە "هێرشەکە بە چەکی RPG کراوەو تەنها زیانی ماددی گەیاندۆتە ئۆتۆمبێلە سەربازییەکانی هێزەکەو هیچ زیانێکی گیانیی لێ نەکەوتۆتەوە.

 

بەگوێرەی بروسکەیەکی بنکەی پۆلیسی قۆریەش، شەوی رابردوو لە گەڕەکی حەمزەلی نزیک گەراجی بەغدا 5 گەنجی کورد رفێنراون.

 

بەپێی ئەو بروسکەیە ئەو گەنجانە لەلایەن دوو ئۆتۆمبێلی بێ تابلۆوە رفێنراون لە جۆرەکانی مێگ زەمینی و کیای بارهەڵگر.

 

هاوکات سەرچاوەیەک لە بەشی پۆلیسی کاروباری بازگەکانی کەرکوک بە ماڵپەڕی دوارۆژ-ی راگەیاندووە کە "لەیەکێک لە بازگەکانی باشووری شارەکە داواکراوێک بەمادەی 4ی تیرۆر دەستگیرکراوە".

 

دەشڵێت: "دەستگیرکراوەکە ناوی (م. ش. م)ەو دانیشتووی قەزای خورماتووەو لەلایەن دەزگای (ئاسایشی نیشتمانی)یەوە داواکراوە".

 

هەمان شەو لە گەڕەکی پەنجا عەلی لەلایەن ژمارەیەک گەنجی نەناسراوەوە ئاڵای کوردستان لەسەر بینای قوتابخانەی جیهاد دڵپاک هەڵدراوە.

 

پۆلیسی عروبە کە بۆ لابردنی ئاڵاکە هیزێکیان چووەتە قوتابخانەکەوە لە بروسکەیەکدا ئاماژەی بەوە کردووە کە دەرگاو پەنجەرەی قوتابخانەکە شکێنراون و بەشێک لە کەلوپەلی ئیدارەکەشی شێوێنراوە، ئەوەش وایکردووە لەلایەن نەهێشتنی تاوانەوە دۆسێی لێکۆڵینەوە بۆ رووداوەکە بکرێتەوە.

 

هەروەک لە نزیک حوسێنییەی جەعفەر سادق-یش لە گەڕەکی حوزەیران ژمارەیەک چەکدار هەڵیانکوتاوەتە سەر ماڵی هاووڵاتییەک بەناوی "عەباس عەسکەر ئەکبەر" تەمەن 48 ساڵ و بەوتەی سەرچاوەیەک لە پۆلیسی عەدالە، "چەکدارەکان بڕی 10 ملیۆن دیناریان دزیوەو بڕێک زێڕی ماڵەکەشیان بردووە کە نرخەکەی بە نزیکەی 11 ملیۆن دینار خەمڵێنراوە".

 
















زۆرترین بینراوەکان