لەبارەی خەرجكردنی موچەی سێ مانگی فەرمانبەرانی هەرێم رونكردنەوە دەدرێت


نەتەوە  |   17:46:14 2017-12-02  |   (10,813) جار خوێندراوەتەوە

لە وەزارەتی داراییەوە روونكردنەوە لەبارەی موچەی سێ مانگی فەرمانبەرانی هەرێم دەدرێت، سەرۆكی لیژنەی دارایی و كاروباری ئابووری پەرلەمانیش لەبارەی نەمانی سیستەمی پاشەكەوتی موچە و دانەوەی لەساڵی داهاتوو زانیاری ورد دەخاتەڕوو.
A+    A-

 

حەسەن رەشید بەڕێوەبەری گەنجینەی یەكی سلێمانی سەبارەت بەرێنمایی وەزارەتی دارایی لەبارەی خەرجكردنی موچەكانی (10، 11، 12)ی ساڵی 2017، رایگەیاند: تائێستا لەبارەی گۆڕانكارییەكانەوە هیچمان پێنەوتراوە، لەمانگی (12)ەوە ئاگادارمان دەكەنەوە چی لەو موچانە بكەین، دەوەستێت یان دەكرێت بەپاشەكەوت، خەرجییەكان دەوەستێت یان بەردەوام دەبێت.


لای خۆشیەوە عیزەت سابیر، سەرۆكی لیژنەی دارایی و كاروباری ئابووری لەپەرلەمانی كوردستان لە لێدوانێكدا بۆ سایتی ئێس ئێن ئێن رایگەیاند: تەنها ئەوەمان بیستووە كە لەمیدیاكانەوە سەرۆكی حكومەت رایگەیاندووە، موچەی مانگی ئەیلول دەدرێت، نازانین دوای ئەوە حكومەت چی لەو موچانە دەكات كە نەیداوە.


وتیشی: "ئەوەی تائێستا پێمان ڕاگەیەنراوە ئەوەیە كە پاشەكەوتی موچە بخرێتەسەر حسابێكی بانكیی فەرمانبەران و بتوانن قەرزەكانی حكومەتی لێبدەنەوە".


عیزەت سابیر سەبارەت بەپڕۆژەكەی پەرلەمانیش لەبارەی پاشەكەوتی موچە، رونیكردەوە، "پڕۆژەیەكمان ئامادەكردووە بۆئەوەی پاشەكەوتی موچە بەمیكانیزمێكی باش بدرێتەوەو لەسەرەتای ساڵی نوێوە سیستمی پاشەكەوت نەمێنێت و سیستمێكی نوێ بۆ پێدانی موچە جێبەجێبكرێت".


ئەوەشی خستەڕوو، "پڕۆژەكەمان خوێندنەوەی یەكەمی بۆ كراوەو سەرقاڵی ئامادەكردنی راپۆرتین، بەڵام راپۆرتەكان تەواو نەبووە بۆئەوەی بخرێتە بەرنامەی كاری پەرلەمانەوە دەنگی لەسەر بدرێت".

















زۆرترین بینراوەکان