ژمارەی بومەلەرزە بەهێزەكان زیاد دەكات


نەتەوە  |   13:02:11 2017-11-20  |   (1,232) جار خوێندراوەتەوە

زانایان هۆشداری دەدەن بەوەی بەهۆی خاوبوونەوەی ناوبەناوی سوڕی زەوی ئەگەری زیادبونی ژمارەی بومەلەرزە بەهێزەكان لە ساڵی داهاتوودا هەیە. 
A+    A-

 

زانایان هۆشداری دەدەن بەوەی بەهۆی خاوبوونەوەی ناوبەناوی سوڕی زەوی ئەگەری زیادبونی ژمارەی بومەلەرزە بەهێزەكان لە ساڵی داهاتوودا هەیە، هەرەوەها زاناكان لەو باوەڕەشدان گۆڕانكاری لە خێرایی سوڕی زەوی دەشێت ببێتە چالاكیی بومەلەرزەیی بەتایبەتیش لە هەرێمە گەرمەسێرەكاندا كە چڕی دانیشتوان تێیاندا بەرزە.


هەرچەندە خاوبونەوەكەی سوڕی زەوی زۆر بچوكە و دەبێتە هۆی درێژكردنەوەی رۆژ بە یەك لەسەرهەزاری چركەیەك، بەڵام ئەوە رونگە ببێتە هۆی دەركردنی بڕێكی گەورەی وزەی ژێرزەوی.


ئەو پەیوەندیەی نێوان سوڕی زەوی و چالاكی بومەلەرزەیی مانگی رابردوو لەرێگەی توێژینەوەیەكەوە خرایەڕوو، كە لەلایەن دوو زانا بەناوی "رۆجەر بیلهام" لە زانكۆی كۆلۆرادۆی ئەمریكا و "رێبیكا بێندیك" لە زانكۆی مۆنتانا لە میسۆلا لە كۆبونەوەی ساڵانەی كۆمەڵەی جیۆلۆجی ئەمریكادا پێشكەشیان كرد.


ئەو زانایانە لەڕێگەی چاوخشاندنەوە بەو بومەلەرزانەی هێزەكەیان لە سەرو ٧ پلەی ریختەرەوە بووە كە لەساڵی ١٩٠٠ەوە رویان داوە لێكۆڵینەوەكەیان ئەنجامداوە، بۆیان دەركەوتووە، لەو ماوانەی سوڕی زەوی هێواش بۆتەوە بومەلەرزەی بەهێز رویداوە و تێبینیان كردوە لەو كاتانەی سوڕی زەوی خاوبۆتەوە ٢٥ بۆ ٣٠ بومەلەرزەی بەهێز لە ساڵێكدا رویان داوە بەراورد بە ساڵەكانی دیكە كەتەنیا ١٥ بومەلەرزەی بەهێز رویداوە.


زاناكان ئاماژەیان بۆ ئەوەش كردوە كە هێواشبونەكەی سوڕی زەوی هەستی پێناكرێت و تەنیا لەڕێگەی كاتژمێری ناوەكیەوە دەتوانرێت بپێورێت.
 

















زۆرترین بینراوەکان