لەبارەی مەترسییەكانی ئەم خواردنانەوە هۆشداری دەدرێت


نەتەوە  |   20:33:28 2017-11-14  |   (175) جار خوێندراوەتەوە

ئاژانسی ستانداردە خۆراكییەكانی بەریتانیا هۆشداریی دەدات، لەوەی زۆر گەرمكردنی خۆراكە نیشاستەییەكان ئەگەری تووشبوون بە شێرپەنجە زیاددەكات.
A+    A-

 

ئەو ئاژانسە ئاماژەی بەوەشكردووە، لەكاتی برژاندن، سووركردنەوەو هەڵكڕوزاندنی پەتاتەو بەرهەمەكانی (فینگەر یان چپس) و خۆراكە نیشاستەییەكانی دیكە، ئەگەر زیاد لەپێویست گەرما پێیان بگات، رێژەی ماددەی ئەكریلاماید (acrylamide) تێیاندا بەرزدەبێتەوە، كە ئەوە مادەیەكی مەترسیدارە بۆ تەندروستیی مرۆڤ.


ماددەی مەترسیداری ئەكریلاماید لەئەنجامی كارلێككردنی هەندێك شەكرو جۆرێكی ترشی ئەمینی بەنێوی ئاسپاراجین دروستدەبێت و بەپێی لێكۆڵینەوە زانستییەكان، چپسی پەتاتەو فینگەر زۆرترین رێژەی ئەو ماددە مەترسیدارەی تێدایە.


لێكۆڵینەوەكان لەوبارەیەوە دریانخستووە، رێژەی بەرزی مادەی ئەكریلاماید لە خۆراكدا تووشبوون بە شێرپەنجە و هەندێك نەخۆشیی دەماریی زیاددەكات.


هەربۆیە لێكۆڵەران جەختلەوەدەكەنەوە، خۆتان لە زۆر گەیاندنی گەرما بە پەتاتە بەدوور بگرن، كە رەنگەكەی مەیلەو قاوەیی دەبێت، بەڵكو تاڕاددەیەك گەرمیان بكەن رەنگەكەیان زەرد بمێنێتەوە، هەروەك پێشنبار دەكەن پەتاتەی كاڵ لەنێو بەفرگردا هەڵنەگیرێت و لە پلەی گەرمیی فێنك (سەروو شەش پلەی سیلیزی) و شوێنی تاریك بمێنێتەوە.


ئاماژە بەوەش دەكەن، نابێت منداڵان ئەو خۆراكانە زۆر بخۆن كە رێژەی ئەكریلامایدیان زۆرە، بۆ نموونە چپسی پەتاتەو فنگرچپس و هاوشێوەكانیان.

















زۆرترین بینراوەکان