ووردەکاری دەستکاریکردنی پاشەکەوتی مووچە


نەتەوە  |   15:57:13 2017-09-30  |   (30,841) جار خوێندراوەتەوە

ئەمڕۆ پەرلەمانی كوردستان گفتوگۆی لەسەر پاشەكەوتی مووچە دواخست، هۆكارەكەشی گەڕاندەوە بۆ كۆمەڵێك پێشهاتی نەخوازراو.
A+    A-

 

ئەندامێكی پەرلەمانی كوردستانیش دەڵێت، دواخستنەكە بەهۆی سیستمی نوێی مووچەوە بووە، بەڵام دەبێت پاشەكەوتی مووچە هەڵوەشێتەوە. بەرپرسانی كەرتی پەروەردە و خوێندنی باڵایش ئاماژە بەوەدەكەن، ئەگەر پاشەكەوتی مووچە لانەبرێت ئەگەری هەیە بایكۆتی خوێندن بكرێت.

 

دلێر ماوەتی ئەندامی پەرلەمانی كوردستان بە سایتی دواڕۆژی راگەیاندووە: ئەنجومەنی وەزیران داوای كردووە چاوەڕوان بین تا سیستمی نوێی مووچە تەواودەكرێت و دەخرێتە بەردەم پەرلەمانی كوردستان، بۆیە ئەمڕۆ تەنیا خوێندنەوەی یەكەم بۆ پڕۆژەی پاشەكەوتی مووچەی فەرمانبەران كرا، بەڵام لە دانیشتنەكانی داهاتوودا قسەی لەسەر دەكەین.

 

ماوەتی، سەبارەت بە سیستمی نوێی مووچەی فەرمانبەران ئاشكرایكرد: بەپێی ئەم سیستمە نوێیە مووچەی پلە باڵاكان كەمدەكرێتەوە، بە پێچەوانەوە پلە نزمەكان زیاد دەكرێت و مووچەی پەرلەمانتار و وەزیر، بەپێی ئەم سیستمە، لەنێوان 3 بۆ 4 ملیۆن دیناردا دەبێت، كەمترین مووچەیش لە 500 هەزار دینار كەمتر نابێت.

 

دلێر ماوەتی وتیشی: بۆ ئەو مەبەستە پێمان وتراوە چاوەڕێ بین تا بزانین نەوت رادەگیرێت یان نا.

 

هاوكات، جەعفەر ئیمینیكی جێگری سەرۆكی پەرلەمانی كوردستان رایگەیاند: بەهۆی كۆمەڵێك پێشهاتی نەخوازراو، گفتوكۆ لەسەر مووچە و پاشەكەوت ناكرێت، بەڵام تەنیا خوێندنەوەی یەكەم بۆ پڕۆژە یاسای هەڵوەشاندنەوەی پاشەكەوتی مووچەی فەرمانبەران كرا، دواتر ڕادەستی لیژنە تایبەتمەندەكان دەكرێت، تا دانیشتنی داهاتوو.

 

سەبارەت بەوەی ئەگەر پاشەكەوتی مووچەی فەرمانبەران لانەبرێت، ئایا مامۆستا و فەرمانبەران بایكۆتی خوێندن دەكەن؟ كەمال نوری بەڕێوەبەری پەروەردەی ڕۆژئاوای سلێمانی بە سایتی دواڕۆژی راگەیاندووە: ئەگەر پاشەكەوتی مووچە لانەبرێت و كێشەكان چارەسەر نەكرێن، ئەگەری هەیە بایكۆتی خوێندن بكرێت، ڕەنگە ماوەیەكی كەمتر بخایەنێت لەچاو ساڵانی ڕابردوو، چونكە ساڵی ڕابردوو مامۆستا 3 مانگ لەسەر شەقام بوو، بەڵام هیچ ئەنجامێكیان دەستنەكەوت.

 

بەڕێوەبەری پەروەردەی ڕۆژئاوای سلێمانی وتیشی: هەموو هەوڵێكی وەزارەتی پەروەردە و یەكێتی مامۆستایان لە ئارادایە بۆ لابردنی پاشەكەوتی مووچە، حكومەت لەڕێگەی لیژنەیەكی تایبەتەوە پێداچوونەوە دەكات بە مووچە و پاشەكەوتی مووچەی فەرمانبەراندا، سێ لەسەر چواری مووچە دەبڕن، بەڵام پێمانوتوون یەك لەسەر چواری مووچە ببڕدرێت.

 

هەر بۆ ئەو مەبەستە، ئاراس فەریق زەینەڵ یاریدەدەری سەرۆكی زانكۆی سلێمانی  راگەیاند: چەند هەوڵ و ئەگەرێك هەیە بۆ چاككردنی مووچە و لابردنی پاشەكەوت، چاوەڕێی حكومەت وپەرلەمان دەكەین، بەڵام تائێستا ئەگەری بایكۆت نییە و لەگەڵیدا نین، چونكە پێشتر كرا و ئەنجامی نەبوو، سەرەنجام منداڵی فەقیر زەرەرمەند ئەبێت.

















زۆرترین بینراوەکان