وێنە.. لە دوو رووداوی جیاوازدا دوو کەس بوونە قوربانیی


نەتەوە  |   18:41:15 2017-09-13  |   (439) جار خوێندراوەتەوە

لە دوو رووداوی جیاجیادا مێردمنداڵێک گیانی لەدەستداو باوکیشی بەسەختی برینداربوو و دوو کەسیش لەلایەن پۆلیسەوە دەستگیرکراون بۆ لێکۆڵینەوە.
A+    A-


لەگوندی وەلی هەیەری سەربە قەزای كفری، مێردمنداڵێك خۆی هەڵواسیووەو گیانی لەدەستداوە، لەرێگەی گەیاندنیشی بە نەخۆشخانە باوكی تووشی روداوی هاتووچۆ بووەو بەسەختی بریندار بووە.

 

لەوبارەیەوە عەلی قەدوری وتەبێژی پۆلیسی گەرمیان لەراگەیەنراوێكدا ئاشکرای کردووە کە ئێوارەی ئەمڕۆ 2017/9/13، لەگوندی وەلی هەیەری سەربە قەزای كفری مێردمنداڵێك بەناوی (بیلال حەسەن غازی) لە دایكبووی 2004، لە ماڵێکدا خۆی هەڵواسیووەو گیانی لەدەستداوە.

 

بەگوێرەی راگەیەندراوەکەی پۆلیسی گەرمیان "لەكاتی هێنانی بۆ نەخۆشخانەی شەهید هەژار، باوكی مندڵەكەش تووشی رووداوی هاتوچۆ بووە".

 

هەربە گوێرەی راگەیەندراوەکەی پۆلیس: "بەوتەی شایەتحاڵەكان ئەو مێردمنداڵەی خۆی هەڵواسیووە دانیشتووی قەزای كەلارەو لەگەڵ باوكیدا كە وەستای خانووە بەمەبەستی كاركردن چوونەتە گوندی وەلی هەیەر لەكاتێكدا باوكی سەرقاڵی كاركردن بووە لە ژورێكی ئەو خانووەدا، ناوبراو خۆی هەڵواسیووەو گیانی لەدەستداوە".

 

ئەوەش روونكراوەتەوە، كە باوكی منداڵەكە بەئۆتۆمبێلێكی جۆری دایۆ بەدوای تەرمی كوڕەكەییەوە بووە بۆ قەزای كەلار، بەڵام خۆی كێشاوە بەدوو ئۆتۆمبێلداو لەئەنجامدا بەسەختی برینداربووەو لە بەشی فریاكەوتنی شەهید هەژار لەكەلار چارەسەری سەرەتایی پێویستی بۆکراوە، بەڵام بەهۆی سەختیی برینەكەیەوە رەوانەی سلێمانی كراوە.

 

ئێستاش بە بڕیاری دادوەر یەكێك لەو شۆفێرانە بەپێی ماددەی 23ی هاتووچۆ بەندكراوەو خاوەنی خانووەکەش كە مێردمنداڵەکە خۆی تێدا هەڵواسیووە بەندكراوە.

 

وتەبێژی پۆلیس گەرمیان راشیگەیاندووە، كە دەستکراوە بە لێكۆڵینەوە لە وردەکاریی رووداوەکە.



















زۆرترین بینراوەکان